അദ്ദിക്ർ

കപടവിശ്വാസികളായ പുരുഷന്മാരും സ്ത്രീകളും തിന്മ കല്‍പിക്കുന്നവരും നന്മ തടയുന്നവരും അദ്ദിക്റിന്‍റെ 40 പേരുകളും മൂടിവെക്കുന്നവരും നാഥനെ വിസ്മരിച്ച് പിശാചിനെ സേവിച്ചുകൊണ്ടിരിക്കുന്നവരും കൈകള്‍ ചുരുട്ടുന്ന പിശുക്കന്മാരും തെമ്മാടികളുമാണ്. അവരോടും അനുയായികളായ കുഫ്ഫാറുകളോടും വാഗ്ദത്തം ചെയ്തിട്ടുള്ളത് നരകക്കുണ്ഠമാണ് എന്ന് 9: 67-68 ല്‍ അവര്‍ വായിച്ചിട്ടുണ്ട്. ചിന്താശക്തി ഉപയോഗപ്പെടുത്താത്ത അവര്‍ ബധിരരും അന്ധരും ഊമരുമായി നരകക്കുണ്ഠത്തിലേക്ക് വലിച്ചിഴക്കപ്പെടാനുള്ള ദുഷ്ടജീവികളും ഏറ്റവും വഴിപിഴച്ചവരുമാണെന്ന് 8: 22; 25: 33-34 സൂക്തങ്ങളിലും അവര്‍ വായിച്ചിട്ടുണ്ട്. 

വിശ്വാസികള്‍ ആത്മാവിന്‍റെ ദൃഷ്ടിയായ അദ്ദിക്റില്‍ നിന്ന് നരകവും നരകത്തിലെ ശിക്ഷാകഠോരങ്ങളും ഇവിടെനിന്ന് കണ്ടുകൊണ്ട് ഒരു കാരക്കാചീന്തുകൊണ്ടെങ്കിലും അതിനെ തടയണമെന്നാണ് പ്രപഞ്ചനാഥന്‍ അവന്‍റെ പ്രവാചകനിലൂടെ പഠിപ്പിച്ചിട്ടുള്ളത്. അദ്ദിക്ര്‍ കൊണ്ട് ഇവിടെവെച്ചുതന്നെ തന്‍റെ വിചാരണ നടത്തി സ്വര്‍ഗത്തിലേക്കാണെന്ന് ഉറപ്പുവരുത്തിയ സാബിഖീങ്ങള്‍ക്ക് മാത്രമാണ് നരകക്കുണ്ഠം അവിടെവെച്ച് കാണിക്കപ്പെടാതിരിക്കുക. അവര്‍ അദ്ദിക്റിനെ എല്ലാവിധ ആപത്ത്-വിപത്തുകളെത്തൊട്ടും രോഗങ്ങളെത്തൊട്ടും നരകക്കുണ്ഠത്തെത്തൊട്ടും കാത്തുസൂക്ഷിക്കുന്ന പരിചയും മുഹൈമിനുമായി ഉപയോഗപ്പെടുത്തുകയും മറ്റുള്ളവരെ അങ്ങനെ ഉപയോഗപ്പെടുത്താന്‍ പ്രേരിപ്പിക്കുന്നവരുമാണ്. വിചാരണക്ക് ശേഷം സ്വര്‍ഗത്തില്‍ പോകാനുള്ളവരെയും നരകക്കുണ്ഠം കാണിച്ച് കൊടുത്ത ശേഷമാണ് സ്വര്‍ഗത്തിലേക്ക് അയക്കുക എന്ന് 19: 68-70 ല്‍ പറഞ്ഞിട്ടുണ്ട്. 32: 12; 70: 4 വിശദീകരണം നോക്കുക.